薑家小窩窩

不經不覺搬咗入黎已經半年喇!住落咗都冇咩嘢,幾舒服

唯一仲有d唔慣就係覺得時間少咗,因為車程遠咗,每日都比以前早起,連帶寫blog嘅動力都冇埋,其實心裡都成日想寫返,只不過真係冇時間(定係冇精神呢?)

發覺新屋進度還未寫完,但已經住咗半年,呢段時間有時會想起舊居,由其諗起第二日要早起返工嘅時候,因為以前住市區,車程短d,瞓多半個鐘真係好好多,仲有以前樓下嘅腸粉同銀菊露,而家冇得成日食就好掛住

其實除咗呢兩樣之外,其他嘅轉變我都覺得o.k,雖然我同國皇係由大屋搬細屋,仲要尺數比以前真係細一倍有多,但生活上又唔覺得差咗喎~

舊居時房內有梳妝台,諗起梳妝台記得第一次有河童家,我就最想擁有梳妝台,上面擺哂我至愛嘅妝物同護膚品,好開心~而家屋細容納唔倒喇!起初設計新屋時呢個亦係我最頭痛之一嘅事,咁多化妝品同護膚品點算好呢!?哈哈!最後都比我安排倒一個幾好嘅位置(暫時都係啦~)

星期一放假又可以同國皇去行街街,不過出街主要都係為新屋d嘢

前一晚突然好想去飲茶,所以先去屋企附近酒樓嘆吓茶先,我哋都唔係飲開茶嘅人,覺得而家飲茶都幾貴,兩個人咁就食咗差不多成百蚊,不過耐不耐去嘆茶又確係唔錯嘅

食飽後我哋就去搭巴士去九龍灣,呢架車都幾方便,經黃大仙彩虹,一個鐘倒就到,去得九龍灣當然係去宜家傢俬啦~今次係要買書櫃,搬咗黎新屋個幾月,d書一直hea喺餐枱下面,仲有所有CD碟都仲喺舊屋嗰邊,所以真係要快d買返個書櫃先得

住咗一星期感覺越來越喜歡,起碼唔洗再行樓梯啦!

先講講交通方面,返工時間比想像中冇咁耐,雖然要搭一程輕鐵轉西鐵,但都好快同方便,由出門口到公司門口,剛好一小時,西鐵仲有月票優惠,唔洗$500一個月任搭西鐵+輕鐵,呢個月票計劃真係造福人群

環境方面都唔錯,離開九龍空氣都冇咁焗,騎樓不時都有風,最鍾意掛洗衣快乾,又有太陽曬吓,廁所雖然比舊屋細一倍,但其實沖涼黎講係夠用嘅,只不過d水唔可以亂咁噴囉~

屋內經過一星期不停執拾後,而家總算各居其位,但要日後慢慢再整理得整齊一d,傢俬仲欠書櫃同梳化,下個月就會買埋書櫃,上星期衣櫃同電視櫃都到埋,兩樣都好滿意,而家冬天衣物放吊櫃,其他衣物加埋我哋d手袋放哂衣櫃攪掂哂,最初仲擔心手袋唔知放邊好

講吓隻麼囡啦~佢頭幾日面對新環境,佢好驚驚呀!一對耳仔紅哂,不停叫足兩日,又冇尿尿去,我哋嘗試比佢用貓沙盤,但麼囡都係喺廁所個去水位去,不過都唔緊要,佢唔喺廁所範圍外大小便都好叻女

住咗成個星期,都冇時間記低返搬屋嗰日嘅情況,因為過去一星期真係太累喇!

10月17日~我同國皇終於都搬家喇!

8點幾國皇已經踢我起身,真係唔想起身囉~成個星期每日瞓得五六個鐘,超眼瞓!

起身又開始執埋d手尾,今日約咗亞棟同石田過黎幫手,9點幾亞棟已經到咗,仲有欣妹都幫手,我分配亞棟同欣妹負責樓下四層,我同國皇就樓上四層,而三家就喺樓下大門口看守著

搬呀搬……真係上氣唔接下氣,到11點倒我哋就搬哂落樓下,國皇就call van,最後call咗兩架,我同石田帶埋麼囡一架,而國皇同亞棟就先送部電視去老爺度再入屯門

攞屋兩個幾月後,終於決定日子搬喇!就係10月17日

因為決定得比較遲,所以只得一星期時間去執拾細遠,呢個星期真係超級累,每晚放咗工返屋企就係執嘢,晚晚執到兩三點

雖然我哋大件傢俬只有餐枱餐椅同電腦枱,但衫褲鞋雜物都夠我多,清哂兩個衣櫃同床櫃嘅衫,足足兩大個紅白藍袋,仲要好多都唔攞走,而我嘅鞋都裝滿一個紅白藍

本來搵搬屋公司,有紙皮箱供應,但國皇想平d就唔搵搬屋公司攪,我就喺公司攞咗兩個大紙箱用,最後當然唔夠用啦~國皇就買咗d紅白藍,再加d細箱仔咁

執到最後一晚,好多嘢都pack唔哂,打算日後慢慢返去再攞,同埋都唔知新屋可以容納幾多嘢

10月13日同國皇一齊放假,9點幾就起身執少少行李入新屋,呢一日有電器同床褥送貨

11點幾入到去,電器已經到咗,冷氣同熱水爐上次已裝好,今次就送埋最後幾樣嘢,電視、洗衣機同雪櫃

到下午我哋就落樓下食午飯先,之後等其他人上黎安裝,3點半倒洗衣機同電視安裝師傅到,跟手又送床褥黎,勁忙碌!

而裝修嗰度亦叫完成,睇下仲有冇d咩要執就可以比埋尾數

自己呢一日親身睇過完成8成嘅新屋,大致上都滿意,我仲睇咗一陣高清,好開心以後有J2睇喇初時驚40寸太大,但實際又o.k喎~

10月9日放假,瞓到好鬼晏,做完少少家務就即刻入新屋睇吓,因為已經完成咗8成喇~

一入到去有種興奮嘅心情,地板同牆身顏色非常之滿意,好在最後轉咗淺色油漆,而鋁窗只欠窗花,仲有巴士門未安裝

騎樓嘅磚都一樣好滿意,個色同個廳超配合,不過有d美中不足,就係廁所側幅牆係做明喉嘅,但就由牆身中間拉落黎,有d礙眼,因為我覺得幅磚太靚,影響咗~原來係國皇意思,佢想方便個插蘇位

而騎樓燈已裝,比想像中冇咁大,又係好滿意,影幾張相後就快快搭車會合國皇,到長沙灣買廁所鏡櫃,上次去過一次都決定要邊款,再揀咗d浴室配件

10月10日就裝埋廳兩支燈,果然襯倒騎樓燈,好開心!

10月2日新屋有兩樣嘢整,裝煤氣同裝電熱水爐,都係得國皇一個人入去

國皇話全屋批灰做哂,某d暗線位都整咗,但我望落去好似冇咩進展咁,都唔知佢下星期尾交唔交倒貨

煤氣喉整好,只可沿牆身較高位置裝,冇辦法,油埋油希望冇咁礙眼,個煤氣煮食爐都送咗黎,比想像中冇咁大,$50換佢返黎都o.k啦~

另外電熱水爐原先安裝位置幅牆做唔倒,而家改咗另一邊,係擔心國皇沖涼會太窄,不過佢話都o.k!冇問題

黎緊個星期就上油、做電線、舖磚

9月19日放假,又入新屋睇吓進度如何

隔咗幾日好似冇咩大變動,只係產咗牆身同拆咗少少騎樓牆

一星期後國皇自己入去睇,電箱已經搬咗位喇!廳燈位亦做咗暗線,楊生已幫我哋買咗磁磚,國皇話個色好似有d白,但我覺得差不多,淡粉紅小花,我好喜歡,好想快d見到完成圖

10月2日有好多嘢要攪,但我要返工,國皇一個攪掂喇!

九月十三日裝修正式開工,十四日第一次上去睇進度

人生第一次攪裝修,起初時對成個工程都唔太了解點樣做,而家總算明白一點點,工程第二日都係拆嘢為主,已經拆咗騎樓門同幅百頁窗,騎樓嘅瓦磚都拆咗一部份,呢日見兩個哥哥仔食完飯返黎,就開始拆d電線

喺返新屋前就一早去元朗一轉,楊生帶我哋去揀地板,但我覺得好難去揀,因為得一塊sample個樣,好難想像成個地板效果,之後揀咗一款淺色嘅木色,希望冇揀錯

跟住去揀油漆,我哋已喺ICI個網睇咗心水色,本來要Almond Essence,但色卡個色比網上睇較深,加上楊生話油出黎比色卡會深dd,所以最後揀Peach Sundae,都係偏淡淡粉紅,主要想間屋warm d

最後就到騎樓用嘅磚,上次亦已經睇中咗,不過楊生介紹我哋睇嘅兩間舖都冇嗰隻款,好在上次有攞卡片同記低款號,咁就比咗資料楊生等佢幫我哋買埋

星期日難得放假,同國皇入新屋睇睇裝修進度,跟住出返旺角買燈飾

上個月已經行咗一次,亦睇中咗一盞廳燈,本應都決定嗰盞,但睇睇吓又覺得唔係好襯個廳咁,左揀右揀之下,考慮另外一款,初時唔係咁喜歡佢個線條,點知sales介紹下,原來支燈可以調教弧度,加上支架係木嘅材料,會配合整體感覺多一d

另外門口位要放多一盞燈,正煩惱要咩款時,廳燈嗰款有獨立一支,咁就可以襯返一set喇!仲揀埋廚房廁所兩支細燈

而家只欠騎樓燈,之前喺元朗睇中一盞我同國皇都好鍾意嘅圓罩燈,個罩邊係木料刻咗星星月亮圖樣,啱啱可以同廳燈襯倒,遲少少先去再買埋喇~

又攪掂一樣事情^.^

上星期二入屯門訂傢俬喇!而家總共訂造6件,包括地台連雙人床、吊櫃、飾櫃、廚房吊櫃、高身廚櫃同地櫃

老細即場畫圖,首先係地台床,因為國皇腳太長,必需訂造張床,4尺X6.5尺,雖然個地台唔可以造太大,但都叫做盡偷空間儲物,最喜歡有一個小小床頭櫃仔,到時可以放盞枱燈,方便瞓前喺床度睇書

每個人心目中嘅dream house都唔一樣,可能好多人嘅dream house想要唔知幾多千尺、獨立屋、大花園、私家泳池再加個無敵大海景,自己發夢變咗大富翁都想有間咁嘅屋,但回到現實,自己嘅dream house又係點呢?其實唔好講話咩dream唔dream house,一個點樣嘅家先至令自己最舒服最溫暖?

由第一日攞倒間屋開始,我就不停構思點樣設計新居好,盡管只係一間公屋,我都希望將一間蝸居變成自己嘅安樂窩,呢個亦係我同國皇嘅小小心願

睇咗咁多年日本家居書,當中有好多都係我想要嘅感覺,不過香港冇咩呢d款式傢俬賣,只得franc franc某d傢俬我喜歡,以下就係自己心目中嘅dream house,有d空間雖然細,但佈置得好好

上星期最後報價,決定用國皇同事黑仔介紹嘅楊師傅,昨晚同師傅簽咗約,大約三十日起貨,佢話唔洗落訂住,等佢做到一半先比都得,而露台用嘅磚同無縫地板就約咗下星期二同我哋一齊去買

之前同國皇行咗一轉元朗,原來嗰度有好多買建築材料舖,上次仲睇中咗一款磚,而師傅間公司就喺元朗,所以決定喺呢度買料,開工日期佢話星期四開始

裝修決定完,跟住就係去訂傢俬喇!昨晚只比咗條門匙師傅,唔記得大閘鎖咗,所以今晚入去新屋開返度閘,順度去攪埋傢俬,黑仔好好人同埋我哋去傢俬舖,佢之前幫襯過又識老細,原來黑仔同佢哋都幾熟咁喎!有傾有講,老細話平少少冇咩問題,不過唔會好多,我哋話唔緊要,最緊要跟足d,貨造得好就得架喇!星期四有師傅上黎度尺,叫我哋將喜歡嘅款印定比佢睇

太好喇!攪咗成個月終於可以落實裝修,今次真係好多謝黑仔同事,兩樣嘢都係佢介紹,又麻煩佢陪我哋周圍走幾次

跟住嘅日子希望順利利啦!

成個八月都為新屋嘅事左頻右頻,真係比攪婚禮煩上十萬九千倍,喺呢段搵裝修師傅嘅日子中,遇著好多令人不是味兒嘅時候

知道我哋會搬嘅人唔多,但大部份嘅人知道我哋想裝修,就話唔好攪咁多嘢喇!間屋又唔係自己,通常聽倒呢d說話我真係有d唔高興,你估我好想攪咁多嘢,裝修唔洗錢咩!房署比倒間新樓我,又或者我有能力買私樓送埋豪華裝修,我咪唔洗攪咁多煩咁多嘢囉~鬼叫我派間舊樓,又冇能力買私人樓,公屋d間隔係衰喎!d電線位同你做到衰到咩咁,明線我都唔介意,但攪到你擺傢俬唔方便囉!左頂右頂咁,咁叫我點用呢!!?間屋已經細,我緊係想盡辦法用盡每個空間啦!咁全屋做過哂d電線係無可奈何

油牆鋪地裝鋁窗都係最基本嘢,我已經廁所同廚房都唔攪佢,只係換廁所門,因為慳返d位,所有嘢都係以實用為最先決,唔係我想豪裝佢,亦冇咁嘅本事豪裝

上星期本來同大口姐約好上大陸,點知國皇回鄉卡過咗期,冇得上,嬲到我死吓死吓,一心跟大口姐上去造櫃會平d,又有人帶路,失哂預算

之後又本來口頭決定搵大口姐個師傅做裝修,星期二晚仲約咗佢哋上黎睇位,睇完第二日出咗張報價,國皇過目後覺得價錢唔合心水,想再考慮吓先,可能自己心急,又唔太了解裝修價錢點知為之合理,覺得都差唔多,而且我又同大口姐講實咁,而家話再考慮好似唔係咁好,但諗清楚錢係我哋比,裝修始終係大工程,冇理由一句唔好意思輕率下決定,第日國皇同大口姐再傾,價錢都冇空間再減,其實國皇覺得最大問題係改電箱位收成$2500,後來我上網check過改電箱位5至10尺內都係$1000倒,亦問過一間街舖都係報$800,咁大口姐個師傅食水好深啫~

就係咁又回到起點,再搵過師傅喇!喺我哋毫無頭緒時,國皇有個同事話可以幫我哋問問,昨晚已經聯絡咗,仲約咗下星期一上屋睇,太好喇!

呢個同事都幾好人,昨晚帶我哋去屯門最多傢俬舖度睇,又教埋我哋點行附加有d咩,咁我哋就問咗兩間傢俬舖,其中一間係佢同事幫襯過,問完覺得價錢都合理,加上而家都唔搵大口姐做裝修,咁都唔考慮上大陸造傢俬,費事煩!

而家暫定個方向係,睇埋國皇同事個師傅先,如果o.k一剔過就最好啦!跟住可以喺埋屯門訂傢俬

今個星期都係頻頻樸樸,到而家裝修都係未下決定,不過星期三同國皇出咗去百老匯買電器,本來都唔洗咁快買住,但而家百老匯做緊promo,而且鬆弛熊禮物又快換哂,問過職員買咗可以keep起d貨一至兩個月後先送都冇問題,咁樣實在太好喇~

經過我哋多次巡舖後,決定買以下款式

電視~呢個係頭號最重要電器,終於等倒有新LED TV睇喇!可能細個比亞哥影響,影音產品我偏愛SONY,雖然明知佢貴過人,但一早同國皇講,電視一定要係SONY,本來睇中EX700,但試機時國皇話D色唔多O.K,睇睇吓就揀咗部NX800,其實係我虛榮心作怪,呢部一出時我哋已經成日上專門店睇,最新傾斜角度設計,外形真係好吸引,不過佢的確比EX700高一級嘅

上星期問平九百幾,點知個sales哥哥冇呃我哋,真係做到星期日,而家買冇得平,但就換咗送部SONY blu-ray機,聽落好似都幾好咁……不過諗真d冇咩用喎!國皇遲d會入PS3,都有blu-ray啦!加上而家睇DVD我都好滿意,sales哥哥見我哋都唔係好想要部機,又冇得平,佢話可以賣返出去,仲即刻幫我哋問價,可賣返$1000,不過部機原價$1980,仲要今年5月先出,國皇覺得賣得咁少$$,最後暫定要咗先,哥哥仔話幾時想賣都可以搵佢攪

雪櫃~Panasonic NR-BT222,只得冰影藍色做緊特價,殺!其實黑色好鬼型,不過唔襯間屋,淺藍色夾d,都幾靚~

星期日行程好緊密,我同國皇一早起身入新屋再度過d尺寸,攪完後就去樓下商場間裝修公司問價

國皇寫低咗大約要做d咩,個師傅都幾見談,佢亦提供咗唔少意見,而當中有d都係我心中所想,我哋都傾咗成個鐘,報咗個大約價,未加起總數時,幾驚天文數字,原來都係我哋budget之耐,不過其中訂造吊櫃我覺得貴咗d喇!

傾完後就去第二個行程,荃灣睇傢俬,之前睇過實惠嘅紅蘋果傢俬,覺得唔錯,荃灣都有一間專賣店,所以就去睇睇,途中見到有幾間燈飾舖又入去睇吓,發覺而家有好多水晶款,以前我好鍾意架!而家反而麻麻哋,靚就真係好靚,不過一諗起清理佢時就麻煩死,同埋新屋樓底都係唔高,根本唔可以用太吊嘅吊燈,睇咗幾間都差唔多款,其中有一盞幾特別,磨沙玻璃,每個燈睪向上望好似星星咁嘅形狀,我哋都幾鍾意,起碼不浮誇

睇完燈食埋lunch就真係去睇紅蘋果喇!一入到去間舖比我想像中細,而且款都唔係咁多,有d失望,好似實惠睇仲多又睇得舒服d,係睇中一個電視櫃,衣櫃同床都唔啱,好快打個轉就走,最後行程,沙田宜家

一收咗匙就即刻諗點攪間屋好,成間屋其實四四方方都好實用,但就最麻煩要拆騎樓幅牆,非必要我都唔想拆咁多嘢,但冇辦法,拆咗佢無論外觀同空間感都會更好

國皇喺網上download咗個software,叫floor planner,自己可以設計哂成個平面圖,國皇用咗一晚完成初形,而我再調整一下傢俬擺位

圖1