2013年6月某天
我的第二個baby要來了
心情還比第一次來的時候興奮
薑薑要做哥哥了
雖然他現在還很小,也不知道發生甚麼事,但希望將來他倆會愛惜對方
而薑媽我也要努力好好照顧自己身體,孕育一個健康可愛的baby
2014~我們期待您的出現
~~~~~~~~~~~~~~~~~~~~~~~~~~~~~~~~~~~~~~~~
2014年2月26日,薑plus仔出世了
26號凌晨1點左右感覺有輕微抽住,見冇規律就照瞓覺,但整晚都瞓唔好,因為兩個鐘倒又少少痛
直至早上7點,半個鐘痛一次,密咗又痛楚大咗,就決定入醫院
落到街上車已15mins痛一次,感覺還好
入到急症好快上產前房,由呢刻開始我雙腳不停震,又好驚
姑娘檢查一度都未開,又未穿水,所以都係瞓床等吓
到中午12點,出去大堂見吓奶奶,佢買咗我最喜歡嘅腸粉,但真係食唔落,食咗兩啖頂唔順返入去休息
醫院派飯,又係唔想食,仲比姑娘話我唔食冇力生,但我心諗,上次生薑哥哥我餓足廿個鐘都生倒啦(對自己好有信心)
1點半時,開始有想痾嘅感覺,心裡諗應該好快就生得,陣痛亦越來越密
呢個時候有兩三個姑娘埋離,同我講調去普通病房,我即刻話有痾嘅感覺同痛密咗,佢哋先唔調走我
之後有個唔太友善嘅姑娘叫我唔好瞓床,起身行吓或坐吓健身波,產程會快D喎
咁我就去坐吓波,又真係條腰冇咁痛,但最痛嗰吓仍然好想死
做咗半個鐘倒就返床休息,痛楚開始有D頂唔順,問姑娘攞笑氣,佢竟然話冇囉!嗰刻真係想喊
隔冇耐助產士小組嘅姑娘過黎搵我,話而家推我過去另一邊,嗰度可比老公早D入黎陪我,由而家到生至出院都會喺同一間房
過到去簡直覺得佢哋救咗我,獨立房間加洗手間
但姑娘同我講,如果今晚9點前生唔倒,就會轉返去普通產房,我一望個鐘,得返6小時,心裡不停叫自己加油
冇耐有個叫鄧姑娘黎,佢真係超級好,我話好痛想要笑氣,佢話我心呼吸做得好好,唔洗用,又一直幫我做按摩,播音樂等我relax D
佢個按摩真係令我舒服好多
薑爸還影我呢個辛苦樣
下午3點幾,我已經痛到顛咗,超級想痾,但姑娘仲叫我忍住,加上當時仍然未穿水
唔知隔咗幾耐,姑娘叫我用力痾,整爆羊水,我用盡全力就穿咗水
好快就叫我試生,push咗幾吓,薑plus終於出世喇!
相比哥哥,今次陣痛時間短一半,但生嘅時候就比上一次痛好多
之後聯針攪咗成個鐘,鄧姑娘話我一直有少少流血不止,但又唔算嚴重
最後都要叫醫生黎睇睇,個女醫生好粗暴,唔同我講聲就再補針,仲要整得勁痛呀!
到咗晚上8點,探病時間到,諗住趁薑爸未走,可扶我去廁所
點知去到廁所門口,我就感覺好暈,跟住就暈咗
當我醒返時先知自己暈咗,好似瞓咗個覺咁
D姑娘都好緊張,仲話我唔應該落床,之後佢哋好好,比我休息瞓吓唔洗湊BB住
兩日後薑plus同我可以出院回家
薑plus~歡迎您呀!
留言列表