當決定去長隆後,就搵團啦!不過上網見好多人都係買package自己去,好似都幾方便咁,但我向來對大陸都驚驚哋,今次又唔想諗行程,最好舒舒服服咁去玩兩日,跟團係最好喇!
諗得跟團緊係想全包啦~唔洗煩嘛!通常睇團第一間就係永安,唔係覺得佢最好,只係慣性吧了!初睇倒一團唔錯,真係全包,幾日後就出老旺行吓旅行社,問咗永安、康泰、美麗華,後兩間都要自費馬戲,比較過永安真係最好,全包+入住長隆第二期新酒店,最重要價錢最合理,返到屋企同國皇商討(其實係會報先啱,佢都冇意見),好快就決定報永安喇~
呢團就係:番禺長隆歡樂世界/香江野生動物園、長隆大馬戲、百萬葵園『薰之戀』、南沙天后宮【金牌土茯苓龜湯宴、葵花雞宴、番禺真味宴】二天精彩之旅 (GGK02E) 個名勁長
我哋選擇咗動物園,因為而家我真係唔敢再玩d太刺激嘅機動遊戲 ,同國皇講時,佢都幾想睇吓動物,仲問我有冇睇過長頸鹿,好似細個返大陸真係有見過,喺香港真係睇唔倒呢~